Mahallalarda xavfsiz muhitni yaratish va huquqbuzarliklarning barvaqt oldini olish ustuvor vazifadir

2025-02-24

Mahallalarda xavfsiz muhitni yaratish va huquqbuzarliklarning barvaqt oldini olish ustuvor vazifadir

Viloyat hokimligida Prezident tomonidan joriy yilning 3 yanvarida qabul qilingan PQ-1-son (https://lex.uz/docs/7330260) Qarori ijrosini hududlarda tizimli va oʼz vaqtida taʼminlash boʼyicha ustuvor vazifalarga oid tahliliy-tanqidiy yigʼilish oʼtkazildi.

Viloyat hokimi Murotjon Аzimov va sektor rahbarlari boshchiligida oʼtgan yigʼilishda:

- kriminogen vaziyat ogʼir mahallalarda ilmiy-amaliy yondashuvlar asosida joylarga chiqqan holda maqsadli oʼrganishlarni oʼtkazish orqali huquqbuzarliklarga sabab boʼlayotgan asl omillarni aniqlash va barham berish boʼyicha tashkiliy-huquqiy choralarni koʼrish;

- mahallalarda yoshlar, ayollar va ishsizlar tomonidan, shuningdek, oila-turmush munosabatlari doirasida sodir etiladigan jinoyatlarning oldini olishda "mahalla yettiligi" har bir vakilining aniq masʼuliyatini belgilash, ushbu toifadagi huquqbuzarliklar profilaktikasiga yangicha ish uslublarini tatbiq qilish;

- aholining huquqiy ongi, ijtimoiy faolligi va fuqarolik masʼuliyatini oshirish, jinoyat sodir etilishiga sabab boʼlishi mumkin boʼlgan ijtimoiy muammolarni hal etishga jamoatchilik vakillari, nuroniylar va mahalla faollarini keng jalb etib borish;

- mahallalar jamoat joylari va yashash xonadonlarida xavfsiz muhit yaratish, fuqarolar hayoti, sogʼligʼi va mol-mulkiga har qanday tajovuzlarning oldini olish maqsadida huquqbuzarliklar profilaktikasiga zamonaviy raqamli texnologiyalar va texnik vositalarni keng joriy etish kabi masalalar muhokama qilindi.

Shuningdek, mahallalarda jinoyatchilikning barvaqt oldini olish boʼyicha har bir masʼul idora va muassasa tomonidan amalga oshirilayotgan chora-tadbirlarning natijalari yuzasidan qatʼiy soʼrov tizimini yoʼlga qoʼyish hamda ushbu masalaga masʼuliyatsizlik bilan yondashgan rahbarlarga taʼsir choralarini koʼrib borish boʼyicha topshiriqlar berildi.